ايندي كي گئديرسن سون باهار كيمي
قاييتما گئرييه دورنالار كيمي
ياشا زيروه لرده ياشا قاركيمي
چئوريليب ياغيشا سئله قاييتما
ايللريم ناحاقدان اوتدو سنينله
دئميرم عومور گون بيتدي سنينله
گئتدين نغمه لريم گئتدي سنينله
ايندي غملي اوتن تئله قاييتما
سن گلدين عومرومه دومان چن كيمي
ياشارسان ساچيما دوشن دن كيمي
باري بوندان بئله ياشا من كيمي
قوخلاييب آتديغين گوله قاييتما
شعر ملمع
بو مثل دؤزدي دئييب لر "ايت هورر كروان كئچر"
هر چه من گفتم نرو بي اعتنا كردي گذر
دامنين تودوم دئديم :من آيريليقدان قورخورام !
زير لب آهسته گفتي آبرويم را نبر!!
چوخلي يالوارديم كي بلكه اوزده قالدين گئتمه دين
التماسم بر دل سنگت نكرد اما اثر
سونرادان گؤردوم كي هر نه ديلده توكسم قالماسان
چون پرستو موقع هجرت نبندد بال و پر
هي دئديم گئتسن ياديندان تئز چيخاردارسان مني
لااقل رفتي چنان كن زود بر گرد از سفر
تئز دئدين تا گؤز يوموب بيرده آچيبسان گلميشم
گفته هايت باورم شد رفتي و كردم ضرر
سن گئدن گوندن گونوزلر گؤزله ريم يول گؤزله دي
نيمه شبها هم ستاره مي شمردم تا سحر
ايل گليب كئچدي ايل اوستن.اما اينصاف سيز نئدن؟
نه برايم نامه دادي نه رسيد از تو خبر
عشقيله بير ليكده عقليمده كؤل اولدي آنلاديم
در هجوم شعله ها با هم بسوزد خشك وتر
چون سنه عشقيم چوخيدي هيجره چوخ يانديم آخي
هر كه بامش بيش آن اندازه برفش بيشتر
گلمه دين گول لنمه ديم اولدوم اودونلوق بير آغاج
عاقبت هيزم شكن زد بر تنم تيغ وتبر
اؤلمايا گؤز ده يدي ظلمت لندي آيدين عشقيميز
بار الها كور گردد چشمهاي بد نظر
باشيما
بو گئجه يخيلييب يئنه دونيا باشيما
فيرفيرا تك فيررانير گئنيش دونيا باشيما
بير دريا واريميش قاشيمين آتدا
اتگيمه آخيب اوتور دريا باشيما
جهان اهلي بيليب سنين عاشيقينم
چوخداندي دوشوب بو سئودا باشيما
ياريمين گوزوندن توشدوممو گورسن ؟
بو نه بلا ايدي گلدي خدايا باشيما
سنسيز گوللو چيچكلي بهاريم پوزولوب
تهمت ورار سنسيز ائل طايفا باشيما
طبيبلردن ده علاج الا بيلمه ديم
چوللره توشدوم دولانير صحرا باشيما
چوخ مني اوزوندن قوغما گوزليم
حسرت قالارسان من اولندن سونرا باشيما
گون گلر پشمان اولارسان ايشلريندن
اوندا مين يول ائدرسن جان فدا باشيما
جايماز گل سنده دوز سپمه ياراما
بير سوران اولمادي نلر گلدي بو رسوا باشيما
سني اونوتسام
من سني اونودا بيلميرم، آخي
اونوتسام نه لري اونودام گرك
گؤيلره باخميشيق آيلي گئجه ده
اونوتسام گؤيلري اونودام گرك!
دنيزي اونودوم، يا دالغالاري
خاطيرن ياديمدان چيخايدي باري
پاييزدا خزاني، قيشداسا قاري
باهاردا گوللري اونودام گرك!
دئ نئجه اونودوم من سني نئجه؟
سئوگي دورنا دئييل پاييزدا كؤچه
يوخوما گليرسن منيم هر گئجه
آيلاري، ايللري اونودام گرك!
سنين خياليندير هسرتله باخان
آديندير هر ساعات قارشيما چيخان
قاريشيب شكلينه گؤزومدن آخان
ياغيشي، سئللري اونودام گرك!
سينمده پشيمان اورگيم قالدي
اوچدون اللريمده لعلگيم قالدي
نه لري ايتيريب، باخ نييم قالدي
نه لري، نه لري اونودام گرك!
نصرت كسمنلي
كونلوم
گلوبدور تنگه اي ظالم ، ستمله قان اولان كونلوم
هميشه باغ وصلينده ، گولوب خندان اولان كونلوم
دوشوب مجنون كيمي ، صحرايه بير ليلي فراقيندا
بوتون عاشقلر ايچره ، منبع عرفان اولان كونلوم
نه اولدو بيلمه ديم دوشدو ، جدا گولزار كويوندان
هميشه خوان وصلين بزمينه ، مهمان اولان كونلوم
كيمه بيلمم ، گئديب اظهار قيلسين محنت عشقين
دؤنوبدور قانه هجرينده غمي پنهان اولان كونلوم
نه چاره ائيله سين ، بيلمم خلاص ائتسين اوزون غمدن
اسير محنت و پا بسته هجران اولان كونلوم
اولورمي بير زمان خرم ، يئتيشسه وصل جانانه
غم هجرينله افغانلار چكيب ، گريان اولان كونلوم
منم فرهاد ! عصرين سئوديگي { واحد } گوزللر دير
اودور كي لاله داغين گؤسترير ، ويران اولان كونلوم
علي آقا واحد
سنسيز اي شوخ منيم خوشگذرانيم يوخدور
سن كي يوخسان ائله بيل جيسميده جانيم يوخدور
عشق پروانه سي ام غم اودونا تابيم وار
خسته بولبول كيمي هر لحضه فغانيم يوخدور
بو يامان گونده منيم بيرجه اوميديم سنسن
سنسيز هيچ بير كسه عالمده گومانيم يوخدور
زولفونه باغلي اولاندان بري مجنون كيمي ام
ائله سرگشته ام هيچ يئرده مكانيم يوخدور
صبر آراميمي الدن غمه هيجرانين آليب
بيرده غم چكمگه بو جيسميده جانيم يوخدور
واحيد ام آتش حسرت بورويوب دوروبري
يانيرام حاليما بير قلبي يانانيم يوخدور
بي وفا يار اليندن روزگاريم گليب تنگه
ظاليمين اوره گي دونوب سانكي بير سنگه
من اونا نه ائتميشم بيلمم او بي مروت
گليب سانكي منله دهشتلي بير جنگه
من صاديق اولدوم عهديمده اما بيلمم
جانانيم ندن بيردن دوندو نيرنگه
عقل و هوشيم گئتدي اليمدن گوزه ليم
ايندي بنزه ييرم ائله بيل بير مشنگه
ز بس سر كويوندا آغلاديم همسايه لر
فغان و آه و ناله مدن گليب تنگه
گوزلريوين آتشي يانديرير مني
كيپريگين دا اوخ دييل دونوب تفنگه
من عشق درديله صحرالاردا گزيرم
سئوگيليم هر آن دونور رنگدن رنگه
گل ايندي جايمازين شكلينه بير باخ
كور اولموش گوزلرينه اگيلميش انگه
ياغيش(باران)...
ياديما سالدي سني مطلبينه چاتدي ياغيش
كوچه لر اولدو گؤزومده يئنه بير آرپا چايي
مني سنسيز نئجه نيسگيل سئلينه آتدي ياغيش
اودو سؤندورمه گه سو قايداسي‌دير آمما دونن
كؤزرن كؤنلومو ياغديقجا آلوولاتدي ياغيش
دامجي دامجي سنه لاي لاي دئدي قوينومدا منيم
نه دئيم بلكه سني كورپه يه اوخشاتدي ياغيش
او قدر مستيديم هئچ بيلمديم آخير نه زامان
سينم اوسته ساريلان تئل‌لري ايسلاتدي ياغيش
سورا بيلديم آپاريب قورد گئچينين شنگولوسون
سني مندن آليب آنجاق مني آلداتدي ياغيش...
داها ياشاماقدان پشمان اولموشام
يارب ندن بويله نالان اولموشام
بير كيمسه سوراغيم توتمايير منيم
سانكي چوخدان ترك جهان اولموشام
اوره ييمده دونيا قدر غصه وار
بو سبب دن بويله گريان اولموشام
يا ربيم نه گناه ائتديم بيلميرم
اوزو قارا اهل خسران اولموشام
تك و تنها ياراتدين مي مني سن؟
ندن بويله گؤزده ن پنهان اولموشام
اؤز يوردومدا اؤزگه ديلده يازيرام
تورك دوغولوب فارسي زبان اولموشام
گله جه يي دويوب دوشونورم من
اودور بويله باغري شان -شان اولموشام
داها بس دير قوي گؤزومو بير آچيم
گؤروم نه دن دالي قالان اولموشام
اؤزوم ده دير بو گوناهين هاميسي
اؤز سوچوما اؤزوم قوربان اولموشام
يانديرديلار خوجالي ني دينمه ديم
بس نئجه من دئ مسلمان اولموشام
اوچ جوت بير تك ديغا آلدي توپراغي
من قورخودان قاچيب پنهان اولموشام
اسير اولموش قيزين باخديم شكلينه
اوتانديم كي نه دن اوغلان اولموشام
بوندان دا قارا گون دويا بيلميرم
اؤز گؤزومده بد بخت اينسان اولموشام
من دونه نين بو گونون كي دئييلديم
ساوالان تك كهنه سلطان اولموشام
وطن دردي يانديريبدي جانيمي
اودلار يوردو آزربايجان اولموشام
جايماز سيندير قلمي داي هئچ يازما
آباد ايديم ايندي ويران اولموشام
اجازه وئر بـاخيـم، اي گـول، او قـاره گؤزلـرينـه
وورولميشـام، نـه ائـديـم، آشكـاره گـؤزلـرينــه!
غم ائتمه رم منـي يـوز دفعـه گـونـده اؤلـدوره سـن
بـاخـانـدا بيـرده ديـرللـم، دوبـاره، گـؤزلــرينــه
جمالين آچما، گولوم، قورخورام گؤروب اوزونو
گون اولسون حُسنونه عاشيـق، ستـاره گـؤزلـرينـه
اولايـدي قسمـت، اؤپـه يـديـم او نـازك اللـرينـي
اوره كــدن ائيلــه ميشــم استخــاره گــؤزلــرينــه
كمنــدِ آه ايلـــه صيـــادلـــر دالينجـــا دوشـــر
بـو نـاز ايلـه ا گــر ائتســه ن اشــاره گــؤزلــرينــه
گـؤزوم گـؤتـورمـه ييـر، اغيـارلـر بـاخـانـدا سنـه
بيـر آيـري گـؤزلـه ائـديـرلـر نظـاره گـؤزلــرينــه
شكستـه واحــده اولمــاز طبيــب لــردن عــلاج
قالوبـدر اينـدي سنيـن بيـرجـه چـاره گـؤزلـرينـه
!