نه اعتیبار اونا؟ بیاعتباره یالوارما!
داریخما یاخشی – یامان روزگاریمیز کئچهجک،
بو بئش گون عومره گوره روزگارا یالوارما!
سنین ده بیر گون اولار نوبهارین، ای بولبول،
بو ذوق سوز، بو صفاسیز بهاره یالوارما.
فقیره، عاجیزه، مظلومه احتیرام ائیله،
عدویه، قان ایچنه، ظولمکاره یالوارما !
وطن یولوندا اولوم مرد اوچون سعادت دیر،
حیات اوچون فلهیه – کج مداره یالوارما !
موخالف اهلینه باش اهیمه، سن ده منصور اول،
"انا الحق" اوسته چکیلسنده داره، یالوارما !
نه اولدو دوولتی جمشید، مولکی ایسکندر؟
نه تاجداره نه بیر شهریاره یالوارما !
اگر حیاتینی، واحید، خوش ائتمک ایستیرسن،
نه گول جفاسینی چک، نهده خاره یالوارما
اي گول ، سني هر كس كي ، سئويب بخته ور اولدو
عشقينده بير آنجاق منم عؤمروم هدر اولدو
كيم سئودي قارا زولفونو ، آغ گونلره چيخدي
طالع منه يار اولمادي بير دردسر اولدو
من آغلاديم اؤز حاليما ، بيگانه سئويندي
شكر ائله كي من قالديم او مندن بتر اولدو
كويوندا منه ظلم ائله يندن بري غاليب
آهيم اودو يانديردي ، هامي دربدر اولدو
ييخماقدير مني قصدي نامرد رقيبين
بار وئرمه دي مقصودي ، بوتون بي ثمر اولدو
آيريلمازيديك بير بيريميزدن ، آراميزدا
گؤز دگدي بيزه ، بلكه ده بير بد نظر اولدو
بير بيلمه دين اؤز خئيريني ، بيگانه ني توتدون
منسيز سنه اي گول نه قدر گؤر ضرر اولدو
ائو ييخماغي ، قان تؤكمه گي ظن ائتمه هنردير
هر كيم وطنين سئودي او اهل هنر اولدو
وحشي ليگه ، نامردليگه ، نادانليغا نفرت
انسانليق ايله عؤمر ائله ين بخته ور اولدو
سندن سورا واحيد ، آييق اول قوي دئمه سينلر
دونيايا گليب گئتدي ، حاييف بي خبر اولدو
فضولي دن تخميس
ديار عشقه سلطانام ، بلالر چوخ چكيب باشيم
جلال شؤكتيم غمدير ، هجوم درد فراشيم
عومورلر دير آخير كويونده يارين قانلي گؤز ياشيم
« دگيلسن چوخدان اي گردون جهان سئرينده يولداشيم »
« نولا خم اولسا قدديم ، سندن آرتيقدير منيم ياشيم ؟ »
خيال ائيلر گؤره ن ، بير بولبولم گولزار عشق ايچره
ياخار گولزاري نالم آه آتشزار عشق ايچره
مني سئوداي حسرت دير ييخان آزار عشق ايچره
« ترازوي عيار محنتم بازار عشق ايچره »
« گؤزوم هر دم دولوب ، مين داشا هر ساعت ده ير باشيم »
گؤروب روسواليغيم ، عشقينده يارين طعن ائدر هر كيم
بلالر چكمه گه گويا مني چرخ ائله ميش تحكيم
فلكدن باشيما داشلار ياغار ، قيلماق ديلر تركيم
« سرشكيم آل ، باغريم پاره ، بير كوه بلايام كيم »
« هميشه لاله و لعل ايله رنگيندير ايچيم داشيم »
حياتي عاشيقين عشق اولماسا ، افسانه بير رؤيا
محبت دير فقط پژمرده لر قلبين ائدن احيا
مني عاشيق دوغوب قوينوندا يالنيز بسله ميش دونيا
« منه مانند بير ديوانه صورت باغلاماز ، گويا »
« قلم سينديردي تصويريم چكندن سونرا نقاشيم»
سئوينجي كؤنلومون يار ائتديگي قهر و غضبدندير
وفاده ثابت اولماق عاشيقه ، اصل نسبدندير
جفايه دؤزمه مك « واحيد » ، ددئمه رسم ادبدندير
« فضولي ! خازن گنج وفايام اول سببدن دير »
« گهرلر تؤكدو اسراف ايله بو چشم گهر پاشيم »
هر كس كي دئسه درديمي دلداره منيم چون
گويا كي طبيبيمدير ائديب چاره منيم چون
بير بولبولم اؤز ناله زاريم منه بسدير
كيم يالواراجاق گولدن اؤتور خاره منيم چون
بير لاله روخون من يئنه زولفونده اسيرم
گؤردوكده دئيير خلق گونو قاره منيم چون
جاندان كئچه رم بير ائله حال اهلي اولايدي
درديم دئييب اول دلبره يالواره منيم چون
پروانه ده اولسايدي اگر منده اولان عشق
يوز شؤق ايله چيرپاردي اؤزون ناره منيم چون
هيچ بير كسه راضي دئييلم يار يولوندا
منت چكه بوندان بئله اغياره منيم چون
باشدان باشا واحيد ، بوتون عالم گوزل اولسا
آرتيقدير هاميدان يئنه مه پاره منيم چون
ناز ائت منه، اي سئوگيلي جـانـان منـه نـاز ائـت))
اوّل بـاخيشينـدا منـي حئيــران ائلــه ديــن ســن
بير اينجه گولـوشلـه اوره گيـم قـان ائلــه ديــن سـن
سـونـرا منـي بيـر لطفيلـه خنـدان ائلــه ديــن ...
كافيـر قيـزي آخيـر منـي صنعـان ائلــه ديــن سـن
((يانسين ديليم آغزيمدا دئسـم نـازيـوي آز ائـت
ناز ائت منه، اي سئوگيلي جـانـان منـه نـاز ائـت))
٢
خلـق ائيلـه ميـش اؤز كئيفـي گلنـده سنـي تـاري
اؤلـدور بـو بـلادن منـي قـورتــار سنــي تــاري
رحـم ائـت منـه، بيگـانييـه نـاز ائيلــه مــه بــاري
آلقيـش ائلـه بيـر عـاشيقينــي محــرم راز ائــت
انصـاف ائلـه اؤز عـاشيقينـي محــرم راز ائــت
((ناز ائت منه، اي سئوگيلي جانـان منـه نـاز ائـت))
٣
آيينه نـي حئيـرتـده قـويـوب، عكـس جمـاليـن
خورشيدي خجـالتـده قـويـوب عـارض ِ آليـن
عاشيقلـري حسـرت قـويـوب زولفيلـه خـاليـن
بلكـه اولا قسمــت بيــزه گــولــزارِ وصــاليــن
هردن بو سينيق كـؤنلـومـو بيـر لطفلـه سـاز ائـت
((ناز ائت منه، اي سئوگيلي جانـان منـه نـاز ائـت))
۴
گـؤردوم، گـؤزه ليـم، اوزگييـه سـن نـاز ائلـه ينـده
آز قالدي كي، روحوم اوچا، جان قالمادي منده
بـو نـاز و نـزا كــت وارايكــن بيــر بئلــه سنــده
درد اهلـي اينـان دوشمـه يـه بيلمــز بــو كمنــده
دائـم بـو گـؤزه ل خلقتــه ميــن رازِ نيــاز ائــت
((ناز ائت منه، اي سئوگيلي جانـان منـه نـاز ائـت))
۵
تبيليس شهرين ائيله ميش هر كيمسه كـي، ايجـاد
جنّت كي، دئييرلر، ائـديـب ايجـاد اونـو شـدّاد
بـوردان آپـاريـب حـوري و قيلمـان و پــريــزاد
يـارب، بـو پـريچهـره لــري بنــده نــواز ائــت
((ناز ائت منه، اي سئوگيلي جانـان منـه نـاز ائـت))
۶
دونيا اوزونه يـاخشـي گـؤزه لـر گليـب هـرچنـد
اولمـاز سنـه بيـر اؤلكـه ده نـه ميثـل، نـه مــاننــد
تبريز، باكي، تهران، شكي، شيروان، قوبا، دربند
گنجـه، قــارابــاغ، شهــر بخــارا و سمــرقنــد
ايسترسـن ا گـر، عـزم رهِ مـولـك ِ حجـاز ائـت
((ناز ائت منه، اي سئوگيلي جانـان منـه نـاز ائـت))
٧
اولمـا گـؤزه ليـم، صـورتينـه بيـر بئلــه مغــرور!
مـن ائتميشـم عشقيملـه سنـي عـالمــه مشهــور
هيجرينـده منـي ائيلـه مـه غـم چكمگـه مجبـور
درگـاهـه منـي قـول دئيـه، مــاننــد ايــاز ائــت
((ناز ائت منه، اي سئوگيلي جانـان منـه نـاز ائـت))
٨
واعـظ، ائلـه ظـن ائيلمـه، حقـي دانيـر عـاشيـق
نه كعبه، نه بوتخـانـه، نـه مسجيـد تـانيـر عـاشيـق
لاكن اؤزونو حق سئـوه ن انسـان سـانيـر عـاشيـق
دونيـاده فقـط بيـرجـه محبّـت قـانيـر عـاشيــق!
سن گئت هلـه، اؤلمـوشلـره تكليـف نمـاز ائـت
((ناز ائت منه، اي سئوگيلي جانـان منـه نـاز ائـت))
٩
واحـد، دئمـه مــن دائمــي يــم ذؤق و صفــاده
منصـوري(١) ده يـاد ائتمـه لـي ييــك دارهِ فنــاده
بـو مصـرع ِ نـازي او دئميــش بيــر بئلــه ســاده
يــارب، ســن اونــا رحمتينـــي ائيلـــه زيـــاده
قبر ايچره اونـون روحـونـو لطفـونلـه فـراز ائـت
((ناز ائت منه، اي سئوگيلي جانـان منـه نـاز ائـت))
مين لرجه گوزل اولسادا هر ميللت ايچينده
اولماز سنه بنزر گوزليم خلقت ايچينده
هيجرينده نه لر چكتيگيمي وصلينه يئتسم
بير بير سنه عرض ائيله يرم صحبت ايچينده
اول زولف پريشانه او گوندن كي اسيرم
مجنون دئييلير آديما جمعيت ايچينده
كويوندا صفا چكمه گه يول وئرمه رقيبه
يوخدور يئري خاين آدامين جنت ايچينده
بيگانه سوزون آچما منه غصه دن اوللم
بيماره ايچيتمه زهري شربت ايچينده
مين جاذبه واردير گوزليم مست گوزونده
انسان سنه باخديقجا قالير حئيرت ايچينده
واحد مني هر دم كي گوروب دينديرير اول شوخ
كونلوم آچيلير روحوم اوچور لذت ايچينده
يوخ دئين درديمي جانانيما گؤزدن دوشدوم
سالدي هيجران اودونو جانيما گؤزدن دوشدوم
من بو گول اوزلو لرين بولبول شيداسي ايديم
بيري رحم ائتمه دي افغانيما گؤزدن دوشدوم
چوخ قارا گوزلولر زولفونه حسرت چكديم
يانمادي حال پريشانيما گؤزدن دوشدوم
آغلاديم هيجرينه بيگانه ني گولدوردو منه
باخمادي ديده گريانيما گؤزدن دوشدوم
نئله ميشديم گوناهيم بيلمه ديم آخر نه ايدي
حسرت اولدوم گل خندانيما گؤزدن دوشدوم
هر طبيبه غم پنهانيمي اظهار ائتديم
چاره يوخموش غم پنهانيما گؤزدن دوشدوم
يار ديندير مه دي واحد مني يالقيز قالديم
نه گلن وار نه گئدن يانيما گؤزدن دوشدوم
اوستاد علي آقا واحيد دن بير گوزل شعر
بيرگون گوزه ليم قبريمين اوستن اوتوشرسن
درديندن اولن عاشيقيني باشه دوشرسن
ائتمز ملك اولسا بو قدر ناز و غمضه
اينصاف ائله باري گوزليم سن كي بشرسن
نازيله گلر كن قدمين قوي گؤزوم اوسته
قويما قوري يئر اوستونه بيردن سوروشرسن
بيگانه ايله گزمه دئديم قلبينه دگدي
جانان نه بيليم سن بو قده ر دگمه دوشرسن
بير سالمادين اوز عاشيقيني يادينا ظاليم
اغياريله آمما گئديب هر گون اوپوشرسن
ال چك منه اي دل دئمه زولفوندن او ماهين
بير گون بو كمنده سن اوزونده ايليشرسن
رحم ائيلمه دين (( واحيد ه )) ظاليم ديريليكده
اولدوكده مزاريمله گئدرسن گؤروشرسن