فخر ائدرم من بو سؤزه:
جانيم - قانيمدير تبريزيم
سؤيله يرم من هر زامان
چوخ ياشا شانلي تبريزيم!
جان ديله سن جان وئررم
ماليم - واريمدان گئچرم
سنين اوچون من اؤلرم
چوخ ياشا شانلي تبريزيم!
گونش كيمي نور ساچيرسان
تاريخه بير يول آچيرسان
ديليم ، سؤزوم ، ايمانيمسان
چوخ ياشا شانلي تبريزيم!
آدين دوشوبدور ديللره
ايلهام وئريب شاعيرلره
ايز قويوبسان تاريخلره
چوخ ياشا شانلي تبريزيم!
قوربان اولوم او سؤزلره
( ياشا تبريز ) دئينلره
جاندان گئچن عسگرلره
چوخ ياشا شانلي تبريزيم!
سن قهرمانلار يوردوسان
ظلمه ووروش اوردوسوسان
آذربايجان اولدوزوسان
چوخ ياشا شانلي تبريزيم!
چوخ دوغموسان مرد اوغوللار
ستارخانلار ، باقيرخانلار
باغبان كيمي ائل اوغلولار
چوخ ياشا شانلي تبريزيم!
بير قوش اولوب اوچايديم من
آزمانيندا گزيديم من
هارايلاييب دئيرديم من
چوخ ياشا شانلي تبريزيم!
سن اويانيش بايراقيسان
آنام، آتام، قارداشيمسان
انقلابلار قايناقيسان
چوخ ياشا شانلي تبريزيم!
نسيم لرين سرين - سرين
نه گؤيچكدير گلينلرين
كؤرپه لريندير ائللرين
چوخ ياشا شانلي تبريزيم!
( بابكم) وورغونام سنه
گئچميشينه، تاريخينه
سئويملي او گؤزللره
چوخ ياشا شانلي تبريزيم!
( شعر : بابك قوجا اوغلو)
ساچلارينا بنزتميشم گئجه مي
اوزاق گزمه يانيما گل سئوگيليم
دوداغيندا ايتيرميشم سؤزومو
گولوشونله جانيمي آل سئوگيليم
سن او تايدا من بو تايدا آرالي
كؤنلوم درد ايلندن اولوب يارالي
يانيما گل آذربايجان مارالي
گولوشونله جانيمي آل سئوگيليم
سن منيم چون يازيلماميش بير شعير
سطيرلر دينله نير سطيرلر دئيير
بو كلمه لر ماهني كؤينه يي گئيير
گولوشونله جانيمي آل سئوگيليم
بابكين شعرينده غم وار كدر وار
ووصالا چاتماغا مين بير تهر وار
هر گئجه سونوندا يقين سحر وار
گولوشونله جانيمي آل سئوگيليم
گاه اوره ييم لال دايابيب گاه جوشور
فصيللر آخارينا سوز قوشور
آيزيليقدان لاپ باغريما قان دوشور
منده سئوگي تزه – تزه اويانير
گورمه ينده گوزلريني آغلارام
هارايلارام غمدن ماهني باغلارام
لالا كيمي اوره ييمي داغلارام
منده سئوگي تزه – تزه اويانير
اوتن سئوگي گليب – گئدن نفس ميش
سئوديكلريم بوش بير خيال هوس ميش
سنسيز اوتن هر ثانيه ام ابس ميش
منده سئوگي تزه – تزه اويانير
بير گوزلسن گوزللرين اولدوزو
حياتيمين بال –شكري – داد – دوزو
سيلينمك ده اوره ييمين كاس – توزو
منده سئوگي تزه – تزه اويانير
بابك قوجااوغلي