هيئت ميللي قورولدو ؛ خوش زمان اولسون گرك
ياتماسين بيرده بو هيئت جاودان اولسون گرك
پرچم مشروطه نصب اولسون بو آذر يوردونا
پارلاسين آفاقه بير گون تك عيان اولسون گرك
غنچه لر آچسين ؛ بزه نسين كوه و صحرا لر تمام
آذرستان سر به سر مثل جنان اولسون گرك
عدل و انصاف ايله قوي تاپسين بو تورپاق انتظام
ديكتاتور ظلمين چكنلر شادمان اولسون گرك
نكهت عطر ايله دولسون گوشه ي باغ و چمن
لاله و سونبول آچيلسين بوستان اولسون گرك
بولبول مشروطه وئرسين نو باهارين مژده سين
آذرستان اهلي گولسون كامران اولسون گرك
مجلس ميللي ده قورسونلار گرك ديوان عدل
مرتجع چكسين جزاسين باغري قان اولسون گرك
ال – اله وئرسين تماما خلق آذربايجان
اوردوموز دعوا گونونده قهرمان اولسون گرك
بسله سين ميللي حوكومت ميللتين ائولاديني
حشره تك خلقين باشيندا سايه بان اولسون گرك
ملته وئرسين ترقي دانش و فرهنگ ايله
علم و صنعت كاني آذربايجان اولسون گرك
آذرستان تورپاغين بير باغ رضوان ائتمه يه
فرقه نين رهبرلريندن باغبان اولسون گرك
تنگ اولور باشيما تك ليك ساري، عا لم گئجه لر
ير نفر اولمادي منله اولا همدم گئجه لر
عشقه بيگانه اولانلار نه بيلير كيم نه چكير
چكمه سين من چكني اهل جهنم گئجه لر
بير منم، بير بو قلم ، بيرده بو ويرانه كونول
اوچوموزده گليريك ناله يه باهم گئجه لر
كيمسه بيلمز اورگيم سيرريني دونيادا منيم
ياز قلم دورما كي سن سن منه محرم گئجه لر
يارالي كونلومه كوندور وورولان ياره لره
مهربان يار الي ايستر قويا مرهم گئجه لر
نه وئرر گوندوزو مهلت منه هيجران ستمي
نه قويار باش يئره بير لحظه قويام غم گئجه لر
عشقينه صادق اولان جهد ايله همت كمرين
درد و غم چكمه يه باغلار بئله محكم گئجه لر
منده مجنون كيمي زنجيريده گوررم اوزومو
اوندا كي زولفون اولار گوزده مجسم گئجه لر
من چكن غم يوكونو بير گئجه چرخين بئلينه
قويسالار، پشت فلك غمدن اولار خم گئجه لر
پرده لي قويدو سوزون « بارز» ه فاش ائيله مه دي
سرَلر اورتويو بو قورخولو مبهم گئجه لر.