توكدي عومرومو درد و غم فراوانين
نه وقت اولوركي ، بو جانيم اولايدي قوربانين
اسير درد و غمم ، بير نظر اوزون گوره لي
نه اويله وصلين اولايدي ، نه بويله هيجرانين
گئجه صباحه كيمي ، ناله چكمه ييم نئيليم؟
سيزيلداشير اوره گيمده يارا سي پئيكانين
فراقا دؤز ، دئدين اي شوخ ، منده كي دؤزورم
نه وقته كيمي دؤزوم ؟ طول چكدي فرمانين
روادير سن كيمي زيبايه چرخ چارمدن
"وان يكاد " سسي گلسه گر مسيحانين
گر ايسته سن قاييدا صبح صادق اؤز يئرينه
الين فداسي اولوم ، چاك قيل گيريبانين
او خطي قويما لبين اوستونه سالا سايه
صفاسي اؤزگه دي ، ظلمت سيز آب حيوانين
ايلان ويران ياتار اما ، منيم يوخوم گلمز
دؤشنده خاطيريمه زولف عنبر افشانين
فراقا "راجيني " يانديرما بير حذر ائيله
كي ، قورخورام ياناسان حئيفدير سنين جانين