يازيب درد دل پورخونومو دلدارا گوندرديم

شيكسته بولبولون احواليني گولزارا گوندرديم

زبان عرض حالا جورأتيم يوخ ، روبه رو اولسام

بو أوزدن ثبت ائديب درد دليم طومارا گوندرديم

مركب ايچره حل قيلديم سواد چئشم خونباري

يازيب بير نامه ي شؤق ، اول گؤزو خوممارا گوندرديم

گئديب اغيار ايله اول ماه روخ سئير گولوستانا

تؤكوب ايرماقا ثابيت اشكيم  ، اول سيارا گوندرديم

او كويون ايتلرينه نذر ائتميشديم دل زاري

يئتيب مقصودوما هر بير ايته بير پاره گوندرديم

فراقي ياره لركيم سينه ي مجروحا وورموشدور

قوپاريب پنبه سين اول ياره أوستن يارا گوندرديم

منه مئيدن كئچن گون تؤبه وئردي شيخ ، اي سيد

بو گون منده آليب مئي شيخ اوچون كفاره گوندرديم

دون ائشيتديم بير سيه زولفه گرفتار اولموسان 

 اي ملك صورت منيم تك عاشق زار اولموسان

وئرميسن بير سنگدل دلدارا نازيك كؤنلونو

سن مگر كؤنلوندن اي مه پاره ، بيزار اولموسان

چكميسن جانان جفاسين ، گورموسن هيجران غمين

شوكر الله حاليما اي گول خبردار اولموسان

گورموسن آيئنه ي وجهينده عكس صورتين

طاقت و هوشون گئديب ، بير نقش ديوار اولموسان

شؤق لعليندن اونون ، اي خسروي شيرين زبان

سيد شيرين سخن تك صاحب اشعار اولموسان

اي كونول عشق ايچره اولدون خار سن ، ديوانه من

              اولدون آخرعشقدن بيزار سن ، بيگانه من

سيمبر بوتلار غم عشقيندن اولدون عاقبت

             خلق آرا بي قدر و بي مقدار سن ، افسانه من

ياد چشم شوق شمع عارض جانانه دن

             اولدون اي مسكين كونول ! بيمار سن ، پروانه من

سن گوله شوريده ، من بير گنج حوسنون طاليبي

             توتدون اي بولبول ره گولزار سن ، ويرانه من

سيدا ، صد شوكر كيم آسوده اولدوق ، ائيله ييب

            جان فداي غمزه ي دلدار سن ، بيگانه من

منه اول ماه بي مئهريم ،  يقينيم دير كي رام اولماز

  نئديم كي مئهري چيخماز سينه دن عؤمروم تامام اولماز

موراد يار اگر عشق اهليني ناكان قيلماقدير

     بو عين كامدير ، بالله كي بوندان ياخشي كام اولماز

صفاي خاطير ايله سعي لر قيللام ، نه حاصيل كيم

 منيم چون كعبه ي كويوندا ، اي گول ، بير مقام اولماز

غنيمت بيل بو گون ، اي دل ، شراب بزم دلداري

    كي اهل عشق ايچون اول ماهدان شفقت مودام اولماز

ائشيتديم مئي حرام اولموش ، لب دلداريدان سوردوم

    دئدي يار اولان يئرده مئي گولگون حرام اولماز

 نظري يار گئتجك ، غارت ائتدي غم كؤنول مولكون

    بو روشندير كي شه سيز مولكده هرگيز نيظام اولماز

اگر عاشقسن اول بي مئهره ، روسواليقدان عار ائتمه

   محبت اهلينين فيكرينده ، سيد ! ننگ و عار اولماز

 ايچيب هر شام مئي يار ايله ائيله ديم هر سحر توبه

          سينار ساعت به ساعت شيشه ي مئي دير مگر توبه

خياليمدان خطور ائتمزدي كيم دلبر اولا ساقي

         باغيشلا جورمومو كيم ، ائيله ميشديم بي خبر توبه

سو ايچمكدن منه آساندي ، ساقي توبه سينديرماق

         اليم توت ، دور آياغا ، جام وئر ، وئرمز ضرر توبه

بو مشهور مثلدير ساقي جان ، كيم « ئويره نن دورماز »

        اينانما گر ائشيتسن ائيله ييب ميخانه لر توبه

ائشيتديم توبه ائتميش آفتابيم ، قانا دؤن اي دل

         نه تقريب ايله اؤپموش لعل ياري بخته ور توبه

خيال لعل يار ايله هميشه مستم ، اي واعيظ

        نه دير وئرمك منه مئي دن دمادم بي ثمر توبه ؟

اگر اهل هونرسن ، توبه دن قيل توبه اي سيد

       وگر نه ، ائلمزلر باده دن اهل هونر توبه

نئيله ييم مجليس آرا اولسادا اغيار ، اولسون

     تك او گولدن منه بير فورصت ديدار اولسون

غايت شؤقومو گؤر يارا  كي هنگام وداع

     رشكدن منه دئيه  بيلمم كي خدا يار اولسون

هاني ، اي روح و روان غئيرت معشوقه ليگين

     قويما كيم غئير من زارا خريدار اولسون

بير اياغ ايله منيم كؤنلومو آلدين اله سن

  گؤروم ، اي ساقي ي گول چهره  الين وار اولسون

تا كي سرمستيدير ، عشق اهلينه لطف ائيلر يار

     ساقيا قويما او بي مهري كي هوشيار اولسون

اوره گيم قانا دؤنوب ، قوه ت تقريريم يوخ

     يوخدور احواليما بير كس كي خبردار اولسون

بونجا كي سيلسيله ي زولفووو ايستر سيد

    گؤروم اول دامدا بوندان دا گيرفتار اولسون

سانما كي چئشمدن أوزومه اشك تر گلير

بو چئشمه خشك اولوب ، داخي خون جيگر گلير

اي مؤج اشك آخما ، داخي توتما يوللارين

بير رهگذر وئر ، او بوت سيمبر گلير

گه ياد زولفون ائيله ييرم ، گاه كاكيلين

بير فيكر ائله ميشم ، دله فيكر دگر گلير

كسمه اميد وصلدن ايام هيجرده

اي دل ! بو شام كيم گئده ر ، آخر سحر گلير

گر موژده ي وصالي گله ، يوخدو فائده

جانيم چيخار فرحدن ، اگر بير خبر گلير

دونيايا گلمه يير نه سبب بير وفالي يار

باعيث نه دير كي بيري بيريندن بتر گلير

سيد ، گئدر دئديم سر كويوندان ، اي پري

نه مجنونام كي وحشت ائيله يم ليلا جفاسيندان

             دوشم صحرايا سرگردان غم عشقين بلاسيندان

نه فرهادام كي داغلاردا وورام اوز باشيما تيشه

            قوتارماقچين بو شيرين جانيمي هيجران بلاسيندان

وطنده جورو جانان خوشدور ، غربت ايچره راحتدن

             خداوندا قورتارما مني جانان جفاسيندان

كولاهيندان چيخارتديم كاكيلين يالوارا يالوارا

            ايلاني آري شيرين ديل چيخاردار اوز يوواسيندان

سگ كوي حبيبيمله قديمي آشنادير دل

             خداوندا آييرما اشناني آشناشيندان

گلير يانيما غير ايله نگاريم حال سورماقچين

              منه بالله خوشدور يوز جفاسي بو وفاسيندان

دريغا گئتدي خاكا عرض حالي سينه ده سيد

             بيانا چكمه دي اول شاها اوز شرم و حياسيندان

دونن گئجه منه هم بزم بير ماه سمنبر ايدي

مه جمالي ايله گوزلريم منور ايدي

باشيمدا شعشه ي مئي خاطيريمده ذوق وصفا

بير الده طورره ي دلبر ، بير الده ساغر ايدي

گئجه م او حور جماليله روز تك روشن

يئريم بهشت برين ، باده م  آب كوثر ايدي

نه خواهش ائله سم اول بزم آرا اولوب حاصيل  

 نه آرزو ائله سم ياردان ، ميسر ايدي

او گونه چوخ گئجه لر گورموشم بهشت آسا

ولئيك اول گئجه هم ، بير بهشت ديگر ايدي

خدا كئچن گئجه ني عومرومه حساب ائله سين

كي هر دقيقه سي يوز مين گونه برابر ايدي

او قدر آختارارسان ، اي شه ديار وفا

كي حيف اولدو بو سيد ، رقيبه چاكر ايدي