ساغليقلار دئييلدي جيغير _باغيرلا
اؤشوين قلبينه گيرن اولدومو؟
گؤزوندن قلبينه دوشن جيغيرلا
آخان گؤز ياشيني گؤرن اولدومو؟
ساغليقلار اوزاندي ....
سحره كيمي
چاليب اويناديلار كئف ائله ديلر
چيرپيب پيلله لره سون اوميديمي
( واغزالي ) اوستونده دفن ائله ديلر .
سون اوميد!
او منيم گره ييم ايدي ....
يولونا شام توتدو نئچه قيز -گلين .
شام دئييل .
او منيم اوره ييم ايدي ؛
سون دفعه يانيردي يولوندا سنين .
گئتدين ...
او كوهنه يول نور يولو ايدي،
ايزين دوشن يئرده گول آچمادي كي؟ !
اوزگه يله كئچيردين او يولو ايندي
آياغين آلتيندان يئر قاچمادي كي؟ !
بو يوللار نه يامان وفاسيز ايميش
نييه چيليكله نيب توكولمه ديلر
دوشوب قدمينه هر يوخوش، ائنيش
نييه اوره ييمه چكيلمه ديلر ...
باشينا گول -چيچك سپديلر او گون
آليشان قلبينه سو سپمه ديلر .
( گئت ) دئييب
آلنيندان اؤپدولر او گون
سينيق طالعييني دوزه لتمه ديلر ...
گولدن ...
گولوشونون عومرو چوخ قيسا .
بير حسرت آخيردي قانيندا سنين
اوردا بوتون يئرلر توتولموشدوسا
يئريم گؤرونوردو يانيندا سنين .
دونن تويون ايدي ...
خوشبخت اولاسان!
گورونور بو بيزه قيسمت دئييلميش
اونوت!
ائله بيل كي،
سئوديگين اوغلان
گئتديگين اوغلانميش،
نصرت دئييلميش ....