سن گره ك غنچه كيمي پرده ده مستور اولاسان
نه كي، گول تك آچيليب عالمه مشهور اولاسان
دولانيم باشينا چوخ حئيفدور بو حوسن ايله سن
گئده سن بير پارا ناكس لريله جور اولاسان
عشق اليندن بيليسن عاشيق زارين نه چكر
سن ده گر عاشيق اولوب من كيمي رنجور اولاسان
هله مئي ايچمه ميسن ناز ايله مين جان آليسان
بلكه بير ساغر سرشارايله مخمور اولاسان ؟
حور و غلمان دئييب حسرت چكيسن ،اي زاهيد
گورموسن سن بو نيگاري مگر؟ اي كور اولاسان
سالما تاخيره منيم قتليمي ، اي شوخ نيگار
كي گوروم سن ها بئله خير ايشه مامور اولاسان
ناز و غمزه ائليييب راجيني آلداتما گوزه ل
بيوفاسان ،سنه ميل ائتمه ز اگر حور اولاسان