ياندي جانيم هيجر ايله وصل رخ يار ايسته رم
دردمند فيرقتم درمان ديدار ايسته رم
بولبول زارام دگيل بيهوده افغان ائتديگيم
قالميشام نالان قفس قئيدينده گلزار ايسته رم
دهر بازاريندا كاسيددير متاع همتيم
بو متاعي ساتماغا بير ئوزگه بازار ايسته رم
فاني اولماق ايسته رم ، يعني بلاي دهريدن
راحت جيسم ضعيف و جان افگار ايسته رم
نولا گر قيلسام شب هيجران تمناي اجل
نئييله ييم ؟ چوخدور غميم دفعينه غمخوار ايسته رم
چون بقا بزمينده دير دلدار من هم دورمازام
بو فنا عالم ده بزم وصل دلدار ايسته رم
اي فضولي ، ايسته مز كيمسه رضاسيله فنا
من كي بوندان ئوزگه بيلمم چاره ناچار ايسته رم
عشقدن جانيمدا بير پنهان مرض وار ، اي حكيم
خلقه پنهان درديم اظهار ائتمه ، زنهار ، اي حكيم
وار بير درديم كي چوخ درماندان آرتيقدير منه
قوي مني درديمه درمان ائيله مه ، وار ، اي حكيم
گر باسيب ال نبضيمه ، تشخيص قيلسان درديمي
آل امانت ، قيلما هر بي درده اظهار ، اي حكيم
گل منيم تدبير بيهوده مده سن بير سعي قيل
كيم اولام بو درده آرتيقراق گرفتار ، اي حكيم
گؤر تن عريان ايله احواليمي هيجران گونو
وار ايميش روز قيامت ، قيلما انكار ، اي حكيم
چكمه يينجه چاره ي درديمده زحمت بيلمه دين
كيم اولور درمان درد عشق دشوار ، اي حكيم
رنج چكمه صحت ايچون ، ال فضوليدن گؤتور
كيم قبول صحت ائتمز بؤيله بيمار اي حكيم
خسته ي رنجور و بيمار و پريشان ، نئيله ييم
اولموشام درده گرفتار و غمينده آغلارام
چونكي ائتمز بو فلك درديمه درمان ، نئيله ييم
گرچي دؤران دولانير هر لحظه چوخلار رايينه
دؤنمه دي هرگز منيم راييمجه دؤران ، نئيله ييم
تا كي وصليندن جدا دوشدوم ، دمي خوش اولماديم
ائتدي هيجرين مني هر لحظه گريان ، نئيله ييم
بيلميشم صبح وصالين قدريني شام فراق
ليك يانديردي مني درد ايله هيجران ، نئيله ييم
گرچي پنهان ائيله دين مئهرين فضولي كؤنلومه
كؤنلومون شهري غميندن اولسا ويران ، نئيله ييم
فلك لر ياندي آهيم دان ، مراديم شمعي يانماز مي ؟
هامي بيمارينا جانان ، دواي درد ائده ر احسان
نئچون قيلماز منه درمان ، مني بيمار سانمازمي ؟
اويادير خلقي افغانيم ، قرا بختيم اويانمازمي ؟
گل رخسارينه قارشي ، گؤزومدن قانلي آخار سو
حبيبيم فصل گول دور بو آخارسولار بولانمازمي ؟
غميم پئنهان توتارديم من ، دئديلر ياره قيل روشن
دئسم او بي وفا بيلمم اينانارمي ، اينانمازمي ؟
دئييلديم من سنه مايل ، سن ائتدين عقليمي زايل
منه طعن ائيله ين غافيل ، سني گؤرجه ك اوتانمازمي؟
فضولي رند و شيدادير ، هميشه خلقه رسوادي
سوروشون كي نه سوودادير ، بو سوودادان اوسانمازمي ؟
يار حال دليمي زار بيليبدير بيليرم
دل زاريمدا نه كي وار بيليبدير بيليرم
ياري اغيار بيليبدير كي منه يار اولماز
من دخي آني كي اغيار بيليبدير بيليرم
زولفونو اهل وفا صئيدينه دام ائله يه لي
مني اول داما گرفتار بيليبدير بيليرم
من نه حاجت كي قيلام درد دليم يارا عيان
هامي درد دليمي يار بيليبدير بيليرم
يار هم صحبتيم اولمازسا فضولي ! نه عجب
ئوزونه صحبتيمي عار بيليبدير بيليرم