بير گؤيه رچين كيمي دنسيزله ميشم
بولبولم ، يازدا چمنسيز له ميشم
اسكي دن شانلي – شرفلي ائليديم
ظاليمه قارشي آمانسيز سئليديم
زيروه سي چنلي – دومانلي بئليديم
ايندي مدتدي كي چنسيزله ميشم
درديمين يوخ آدي عنواني دئسم
حيرته دالديرار اينساني دئسم
باشقا بير سوزله بو معناني دئسم
اؤز دياريمدا وطنسيزله ميشم
درد مني يانديرير آمما آدي يوخ
اؤدور آغزيمدا حياتين دادي يوخ
دئميرم دردلر ايچينده آدي يوخ
دئييرم من بئله منسيزله ميشم
اي منيم منليگيم ايمداديما يئت
بيرجه گل منله قؤووش داديما يئت
مني باس باغرينا فرياديما يئت
بيلميسن كي نئجه سنسيزله ميشم