سيزلايير احواليما صوبحه قدر تاريم منيم
تكجه تاريمدير قارا گونله رده غمخاريم منيم
چوخ وفالي دوسلاريم واردير اما يامان گون گلجه ين
تاردان اوزگه قالمايير يار وفاداريم منيم
يئر توتوب غمخانه ده قيلديم فراموش عالمي
من تارين غمخاري اولدوم تاردا غمخاريم منيم
گوزله ريمه هر تبسم سانجيلير نئشتر كيمي
كيپريگي خنجردي آه اول بي وفا ياريم منيم
آسمان آلدي كناريمدان آي اوزلو ياريمي
ياش توكر اولدوز كيمي بو چشم خونباريم منيم
اي بو غملي كونلومون تاب و تواني سويله بير
عهد و پيمانين نه اولدو نه اولدو ايلقاريم منيم
" شهريارم " گرچه من سوز مولكونون سلطاني ام
گوز ياشيمدان باشقا يوخ در شهواريم منيم