گوزليم گوزلرينين صحبتي هر ياندا اولور

بو ملاحتلي باخيشلار قوزو جيراندا اولور

بير علاج ائت منه ايستكلي طبيبيم سنسن

عاشيقين چاره سي اوز سئوديگي جاناندا اولور

بولبول ايستر گولو ، طوطي شكري ، منده سني

عشق سئوداسي بو اوچ عاشق نالاندا اولور

نه طبيعت گوروب عومرونده نه دونيا يئتيريب

او گوزللر كي بيزيم آذربايجاندا اولور

اگر بولبولو اينجيتسه وفاسيز دئمه يين

قيزلارين تقصيري اولماز گناه اوغلاندا اولور

بو گوزلليك كي سنين وار گوزليم اينصافا

نه ملكده ، نه پري ده ، نه بير اينساندا اولور

مبتلا كونلومه بيلمم ، نه اولوب هر گون ايتير

آختاريركن يئنه او زولف پريشاندا اولور

واحيدين بللي دئييل مسكني پروانه كيمي

گاه شمعه دولانير ، گاه گولوستاندا اولور