قهر ائديب پير و جوانه اهرين زلزله سي
عالمي گتدي فغانه اهرين زلزله سي
ورزقان شهريني ييخدي ؛ هريسي ائتدي وئران
يئنه قاتدي قاني قانه اهرين زلزله سي
اولدوروب كؤرپه ني ، آغ ساققالي ؛ آغ بيرچگيده
باخمادي خانه ؛ چوبانه اهرين زلزله سي
تو كدي يارپاق كيمي اينسانلاري ظولميله يئره
اوخشادي باد خزانه اهرين زلزله سي
مردمين كونلوني يانديردي ؛ يامان ائتدي كباب
اود ويران واختدا تيكانه اهرين زلزله سي
تازه داماديله ، تازه گليني اؤلدوردي
قوجاني سالدي زيانه اهرين زلزله سي
باخمادي فقره ، اوروج آغزا ، ساري رخساره
شب قدره ، رمضانه ، اهرين زلزله سي
كيمسه سيز خلقين ائوين ييخدي ؛ داغيتدي تيفاقين
ويردي اود خُرد و كلانه اهرين زلزله سي
پايه سيز ائولري ديوانه فلك ويردي يئره
گوجونو قويدو قاپانه اهرين زلزله سي
قيزلارين ياخشي تخيّوللاري ، رؤيالاريني
دوندريب گؤر نه يامانه اهرين زلزله سي !!
من كي تصوير ائده بيلمم بو يامان فاجعه ني
وصفي گلمز كه بيانه اهرين زلزله سي
اردبيل شهريني ؛ گيلاني تكان وئردي تمام
چاتدي قزوين ؛ همدانه اهرين زلزله سي
يئنه بو زلزله بش گونده چيخار يادلاردان
كاش مسئوللار اويانه ؛ اهرين زلزله سي !!!!!!