باشيما
بو گئجه يخيلييب يئنه دونيا باشيما
فيرفيرا تك فيررانير گئنيش دونيا باشيما
بير دريا واريميش قاشيمين آتدا
اتگيمه آخيب اوتور دريا باشيما
جهان اهلي بيليب سنين عاشيقينم
چوخداندي دوشوب بو سئودا باشيما
ياريمين گوزوندن توشدوممو گورسن ؟
بو نه بلا ايدي گلدي خدايا باشيما
سنسيز گوللو چيچكلي بهاريم پوزولوب
تهمت ورار سنسيز ائل طايفا باشيما
طبيبلردن ده علاج الا بيلمه ديم
چوللره توشدوم دولانير صحرا باشيما
چوخ مني اوزوندن قوغما گوزليم
حسرت قالارسان من اولندن سونرا باشيما
گون گلر پشمان اولارسان ايشلريندن
اوندا مين يول ائدرسن جان فدا باشيما
جايماز گل سنده دوز سپمه ياراما
بير سوران اولمادي نلر گلدي بو رسوا باشيما
بي وفا يار اليندن روزگاريم گليب تنگه
ظاليمين اوره گي دونوب سانكي بير سنگه
من اونا نه ائتميشم بيلمم او بي مروت
گليب سانكي منله دهشتلي بير جنگه
من صاديق اولدوم عهديمده اما بيلمم
جانانيم ندن بيردن دوندو نيرنگه
عقل و هوشيم گئتدي اليمدن گوزه ليم
ايندي بنزه ييرم ائله بيل بير مشنگه
ز بس سر كويوندا آغلاديم همسايه لر
فغان و آه و ناله مدن گليب تنگه
گوزلريوين آتشي يانديرير مني
كيپريگين دا اوخ دييل دونوب تفنگه
من عشق درديله صحرالاردا گزيرم
سئوگيليم هر آن دونور رنگدن رنگه
گل ايندي جايمازين شكلينه بير باخ
كور اولموش گوزلرينه اگيلميش انگه
داها ياشاماقدان پشمان اولموشام
يارب ندن بويله نالان اولموشام
بير كيمسه سوراغيم توتمايير منيم
سانكي چوخدان ترك جهان اولموشام
اوره ييمده دونيا قدر غصه وار
بو سبب دن بويله گريان اولموشام
يا ربيم نه گناه ائتديم بيلميرم
اوزو قارا اهل خسران اولموشام
تك و تنها ياراتدين مي مني سن؟
ندن بويله گؤزده ن پنهان اولموشام
اؤز يوردومدا اؤزگه ديلده يازيرام
تورك دوغولوب فارسي زبان اولموشام
گله جه يي دويوب دوشونورم من
اودور بويله باغري شان -شان اولموشام
داها بس دير قوي گؤزومو بير آچيم
گؤروم نه دن دالي قالان اولموشام
اؤزوم ده دير بو گوناهين هاميسي
اؤز سوچوما اؤزوم قوربان اولموشام
يانديرديلار خوجالي ني دينمه ديم
بس نئجه من دئ مسلمان اولموشام
اوچ جوت بير تك ديغا آلدي توپراغي
من قورخودان قاچيب پنهان اولموشام
اسير اولموش قيزين باخديم شكلينه
اوتانديم كي نه دن اوغلان اولموشام
بوندان دا قارا گون دويا بيلميرم
اؤز گؤزومده بد بخت اينسان اولموشام
من دونه نين بو گونون كي دئييلديم
ساوالان تك كهنه سلطان اولموشام
وطن دردي يانديريبدي جانيمي
اودلار يوردو آزربايجان اولموشام
جايماز سيندير قلمي داي هئچ يازما
آباد ايديم ايندي ويران اولموشام
ياري بنزتميشم سنه ، سني يارا
دلي كونلوم ورولوب او نازلي يارا
گئجه گوندوز درديندن سيزلاديم
ظاليم يار وردون قلمبيمده سن يارا
بير لاله اوزلو ديلبره گرفتار اولموشام
ائتدي روزگاريمي ساچلاري تك رنگين قارا
سن گليب گئتديكده گوزليم خبرين اولمادي
من يازيخ ، قارا گون گوزوم تيكيلدي بو يولا
هر كسين بير گوزلده ميلي اولار
منيم ميليم سنده دير سننين كي ده اغيارا
گزديم بوتون ائلي اوباني سنه تاي تاپماديم
درديندن اريماغيمي بنزتميشم داغدا كي قارا
منه جايماز گل سويلمه عشقيني دئدي
منيم اصلا كونلوم يوخ سنينله ائولنماغا
سايا گلمز :
گؤزليم سينمده كي ياره لر سايا گلمز
منه ائتديگين نازو غمزه لر سايا گلمز
جمله گؤزه ليك لر سنده جمع دير
سنه مجنون اولان عاشيق لر سايا گلمز
هر گولدن ده ، چيچكدن ده گؤزه لسن
سنده اولان گؤزه ليك لر سايا گلمز
بشرده بير بئله گؤزه لليك اولماز
بو گؤزه لليك لر ماليكي اينسان سايا گلمز
اينصاف ائله باري گؤزه ليم عاشيقينم
سينمده اولان مهرو محبت سايا گلمز
شهلا گؤزله ريوه قوربان اولارام من
چكديگيم محنت و هيجران سايا گلمز
او خومار گؤزله ر له منه باخسان نه اولور
بو باخيشلا ائتديگين ثوابلار سايا گلمز
سر كويوندا طواف ائدن چوخ دور
ائله كي مكه ده حج اعلا سايا گلمز
اؤلدوم ، داها يوخ تاب و توانيم
عاشيق لر سيراسيندا داها جايماز سايا گلمز